Morre unha muller de 86 anos atropelada por unha moto en Abegondo
Os servizos de emerxencia confirmaron o falecemento da vítima no mesmo lugar do sinistro sen que chegase a ser trasladada a un centro hospitalario
Unha muller faleceu este xoves pola noite despois de ser atropelada por unha motocicleta na estrada AC-221, ao seu paso polo lugar de Vilar, na parroquia de Crendes, en Abegondo.
O accidente produciuse sobre as 22:00 horas, segundo informou o 112 Galicia, que recibiu o aviso do atropelo e mobilizou ao Servizo de Urxencias Sanitarias de Galicia-061, aos Bombeiros de Betanzos e á Garda Civil de Tráfico.
A vítima, de 86 anos, é veciña da zona, que, segundo relatan as testemuñas, regresaba da casa duns amigos e foi golpeada pola motocicleta que pilotaba un home que regresaba a casa tras saír de traballar.
"O motorista non puido esquivala e acabou na traxedia" explica José Manuel Pérez Abrodos, sarxento do Parque de Bombeiros de Betanzos.
Unha vez no lugar, os servizos de emerxencia unicamente puideron confirmar o falecemento da vítima, sen que puidesen facer nada por salvar a súa vida.
Segundo as primeiras análises do sinistro, a motocicleta non ía a unha velocidade elevada, e de feito o condutor non chegou perder o equilibrio e mantivose enriba do vehículo.
Os veciños do lugar de Vilar están conmocionados pola traxedia. A familia da vítima é moi coñecida por ser propietarios dun local hostaleiro na zona. Desde a Garda Civil piden prudencia á hora de camiñar polas estradas e utilizar as correspondentes prendas reflectantes. A hora de cruzar, facelo polas zonas sinalizadas. Neste caso a vítima non levaba chaleco reflectante.
