Unha furgoneta arde no Castiñeiriño, en Santiago
No vehículo viaxaba unha familia que logrou saír do coche sen queimarse
Foi necesaria a intervención dos bombeiros de Santiago que estiveron traballando no lugar arredor dunha hora
"Teño unha casa alí abaixo e teño esta aquí, e quixen vir para aquí e estaba a estrada completamente cortada e tiven que vir pola pista de arriba. Estiveron traballando os bombeiros e traballando duro, que había un incendio grande".
"Fixeron unha manobra rápida".
"Non deixaban acercarse porque había unha lapas enormes", explica un veciño da zona.
Os condutores que circulaban o domingo contra as nove da noite por esta estrada AC-841 ao seu paso polo Outeiro, en Santiago, deberon levar un bo susto. Sen ninguén ao volante, a furgoneta totalmente en lapas atravesou a vía e desprazouse varios metros costa abaixo. Parou ao chocar contra un farol. A sorte fixo que no seu percorrido o vehículo non batera contra ningún outro coche. Esta estrada que une O Castiñeiriro con Montouto soporta a diario moito tráfico.
Ao lugar desprazáronse dúas patrullas do servizo de bombeiros de Santiago, que lograron sufocar o incendio.
"Desde aí para abaixo non había luz porque, claro, ao chocar queimaríanse os cables".
"Xa se arranxará. O caso é que non lle pasara nada a ninguén", conta o veciño.
Ao parecer os ocupantes da furgoneta decatáronse de que prendía lume, pararon e saíron do vehículo sen mancarse. Posiblemente o vehículo quedou mal inmobilizado.
