Unha condutora sen carné esnáfrase contra a parada de buses de Fisterra

Tal e como foi o golpe o resultado puido ser aínda peor. 

"Meteu o coche dentro e a señora tiña todo por riba dela, as mesas e todo. Houbo que axudar a sacala e tiña sangue pola cara", conta a primeira persoa que chegou a axudar.

"Foi incrible porque aquí báixase amodo e rebentou todo. A muller que estaba dentro tivo moita sorte. Non se explica", coincide outra testemuña.

O curioso é como chegou alí o turismo. Non foi un accidente ao uso.

"Sentía un coche enriba da beiravía que estaba acelerando a tope e cando quixo arrancar meteu a marcha atrás a toda velocidade, 'chiando' roda e esnafrouse contra a caseta", continúa o home

"Foi un golpe grandísimo"

Fixera varios intentos de arrancar o coche. Escoitárona acelerar durante bo tempo no alto da rúa. Despois foi indo marcha atrás ata que, sen querer e sen saber, meteu a marcha atrás. 

"Estivo dicindo que non tiña permiso e, cando foi o golpe, estaba moi nervosa e quixo arrancar o coche pero puxémonos diante para detela", engade o mesmo home. 

Menos mal que a fortuna se puxo de cara. 

"Dentro do malo, a sorte foi que hai un autobús que sae ás 8.40 da mañá que sempre vai cheo de peregrinos e o accidente foi ás 9 da mañá e entón só había dúas peregrinas", conta outra das persoas que chegaron de primeiras.

"Había dúas rapazas orientais que botaron a correr porque non as pillou de casulalidade".

Un parche posto con présa disimula o golpe e os viaxeiros que acoden polo billete nin imaxinan da que se salvaron. 
A vendedora de billetes recibiu a alta ás poucas horas, pero o despacho permanece pechado á espera de que a muller se recupere das lesións.
A condutora é estranxeira pero xa leva tempo vivindo en Fisterra. Enfróntase a un delito contra a seguridade viaria por conducir sen permiso.