Unha concelleira de Lugo do BNG e outra do PSOE apoian o PP para levar a pleno dúas emendas aos orzamentos

O Grupo Municipal Popular logrou este martes os apoios suficientes na comisión extraordinaria de contas do Concello de Lugo para sacar adiante tres emendas de calado aos orzamentos municipais de 2026 grazas ao apoio dunha concelleira do BNG e outra do PSOE, que serán debatidas no pleno extraordinario que se celebrará o venres ás 10:00 horas.

O PP sostivo que, deste xeito, introduce melloras significativas nun documento que, segundo indicou, evidenciaba "a falta de dirección e cohesión do Goberno local".

A sesión rematou coa aprobación unánime, cos votos favorables de PSOE e BNG, da proposta para modificar as bases de execución orzamentaria e habilitar anticipos de subvencións a entidades sen ánimo de lucro.

"Esta medida permitirá adiantar parte das axudas económicas e aliviar a situación financeira de numerosas asociacións que, a pesar de ter correctamente xustificadas as súas subvencións, vense obrigadas a asumir gastos por adiantado debido aos atrasos nos pagos municipais", sostiveron os populares.

Así mesmo, grazas ao respaldo da concelleira do Grupo Municipal do BNG Cristina López Fernández, prosperou a emenda defendida polo PP para aplicar o acordo plenario de xullo de 2025, que contempla a bonificación do Imposto sobre Bens Inmobles e a eliminación do imposto de plusvalía aos propietarios de terreos afectados polo cambio de cualificación urbanística nas áreas de expansión.

Desde o Grupo Popular lembran que esta medida afecta a unha superficie de máis de 15,4 millóns de metros cadrados, na que existen inmobles que carecen de licenza directa e de dereitos urbanísticos efectivos, pero que, con todo, tributan como chan urbano. Unha situación que cualifican de claramente inxusta, xa que impón aos veciños as cargas fiscais propias do chan urbano sen recoñecerlles, a cambio, dereitos reais como a posibilidade de construír ou desenvolver as súas parcelas.

Doutra banda, de novo co apoio da concelleira do Grupo Municipal do PSOE María Reigosa, saíu adiante a emenda para incluír o saneamento de Fermín Rivera, aproveitando as obras xa previstas. Trátase dunha actuación considerada prioritaria e necesaria, que o goberno local non incorporara inicialmente no seu proxecto orzamentario.

Esta concelleira xa votara no pleno de xaneiro en contra do seu partido sobre a mesma moción que presentaron os populares sobre este tema, logrando a súa aprobación.

Para o PP, o sucedido nesta comisión extraordinaria pon de manifesto "un executivo municipal sen rumbo claro nin cohesión interna, fronte a unha oposición que se reivindica como útil e construtiva, capaz de dialogar, sumar consensos e mellorar os orzamentos municipais para o exercicio 2026".

Outras dez propostas que non cumpriron tecnicamente

Pola súa banda, o Goberno local, por medio da súa portavoz, Ana González Abelleira, informou de que a comisión rexeitou dez das emendas presentadas polo PP "ao non cumprir con requisitos técnicos básicos que as fan inadmisibles, tal e como advertiu de forma expresa a Intervención Municipal durante a sesión".

En concreto, as emendas números 37, 38, 40, 42, 44, 45, 47, 48, 49 e 51 explican que non se axustan á estrutura orzamentaria legalmente establecida na normativa vixente. Segundo sinalou o propio interventor, "presentan deficiencias técnicas e non se adecúan á normativa, polo que, de non corrixirse a súa formulación, non poden incorporarse a un proxecto que debe garantir o equilibrio exacto entre os 131.946.261,91 euros de ingresos e gastos".

Así mesmo, durante a mesma comisión rexeitáronse dúas emendas por referirse a cuestións que xa están recollidas no propio deseño técnico do Orzamento. É o caso das emendas números 41 e 39.

Na primeira recóllese a dotación da Relación de Postos de Traballo, que quedou sen efecto ao estar plenamente cuberta polo contido do propio orzamento, que conta coa súa propia partida económica, "destinando preto do 30 % do gasto total ao capital humano do Concello".

En canto á emenda número 39, o proxecto orzamentario destina 17.710.176,08 euros ao Capítulo VI, que inclúe actuacións en materia de vivenda.

A iso súmase o orzamento propio de EVISLUSA, que ascende a 394.837,89 euros e atópase aliñado coas políticas públicas municipais neste ámbito. "En consecuencia, a proposta xa está reflectida na planificación económica do exercicio", din. Finalmente, só tres propostas irán a Pleno.

Tal e como sinalou a concelleira socialista, "aínda que todas elas xa están contempladas no proxecto de orzamentos, o Executivo municipal mostrou a súa vontade de sometelas a debate no pleno previsto para o vindeiro venres". Neste contexto, a portavoz municipal, Ana González Abelleira, reiterou a disposición do Goberno para sumar apoios ao redor da súa proposta.

"Este proxecto para 2026 non é só unha continuación, senón un reforzo da nosa identidade. É un orzamento para unha cidade que non deixa a ninguén atrás, que inviste no seu futuro e que cre no público como a mellor garantía de liberdade e igualdade. Por todo iso, solicitamos o voto favorable a esta proposta", concluíu González Abelleira.