Unha avaría colapsa a circulación de trens de alta velocidade con Galicia
Contra as 19:00 da tarde Adif publicou un chío dicindo que a incidencia estaba solucionada
Algúns trens seguen sufrindo atrasos con respecto ás frecuencias habituais
Adif explicou que se perdeu a tensión eléctrica na catenaria
A circulación de trens de alta velocidade estivo suspendida na estación madrileña de Chamartín-Clara Campoamor por unha incidencia na explotación ferroviaria contra as cinco da tarde. Isto provocou retrasos nos trens con destino á zona noroeste de España, incluída Galicia, e ás provincias de Valencia e Alacant.
A avaría coincide co primeiro día da operación saída da Semana Santa. Un voceiro de Adif explicou que se perdeu a tensión eléctrica na catenaria, polo que os trens de alta velocidade non podían entrar nin saír da estación.
Un dos convois máis afectados foi un que viña de Valencia e que quedou atrapado no túnel que vai de Atocha a Chamartín, polo que foi redireccionado ata Valdemoro para acceder a Atocha desde alí.
Numerosos usuarios amosaron as súas queixas a través das redes sociais, algúns polos atrasos e outros porque algúns trens quedaron parados a metade de camiño sen poder chegar á estación madrileña.
Un voceiro de Adif recoñeceu que se chegou a interromper temporalmente o acceso ao vestíbulo da estación de Chamartín por razóns de seguridade e co obxectivo de evitar aglomeracións na zona de embarque.
Sobre as 19:00 da tarde Adif publicou un chío dicindo que a incidencia estaba solucionada, pero algúns trens seguen sufrindo atrasos con respecto ás súas frecuencias habituais.
A esta situación sumouse outra incidencia na estación de Atocha-Almudena Grandes, que provocou atrasos duns 15 minutos nos trens das liñass C2, C7 e C8 de proximidades.
