Un saúdo de Isabel II desde o balcón de Buckingham canda os futuros reis culmina o xubileu

O xubileu de platino de Isabel II rematou este domingo cun saúdo da raíña, de 96 anos, desde o balcón do pazo de Buckingham e un desfile polas rúas de Londres coa participación de máis de 10.000 voluntarios con música e disfraces de todo tipo para reflectir os momentos máis relevantes dos últimos 70 anos.

O momento máis destacado da xornada marcouno Isabel II ao saír ao balón cos futuros monarcas británicos: o príncipe Carlos e herdeiro da coroa, o duque de Cambridge e o príncipe Xurxo, nunha clara mostra da continuidade da liña sucesoria.

 Con anterioridade Ed Sheeran subiu ao escenario montado fronte ao palacio para cantar "Perfect", como tributo á raíña e ao seu home, o defunto duque de Edimburgo, mentres se vían nunhas pantallas xigantes imaxes da parella real.

Festa nas rúas

Ante milleiros de espectadores e de membros da familia real, militares, músicos, bailaríns, vehículos antigos, autobuses de dous pisos e celebridades tomaron parte da festa, que buscaba destacar a profunda transformación do Reino Unido desde a chegada de Isabel II ao trono o 6 de febreiro de 1952.

Nunha xornada nubrada e fresca, a festa sobre The Mall arrancou co paso da dourada e ostentosa carroza de Estado, que non se mostraba en público desde había vinte anos, e que transportou a Isabel II na súa coroación na abadía de Westminster en 1953.

Tambores, gaitas escocesas e trompetas acompañaron o desfile coa Garda real cos seus uniformes vermellos e coas bandeiras dos países da Commonwealth.

No palco un sorrinte príncipe Luís, de 4 anos, acaparou a atención das cámaras de televisión por moverse e levantar os brazos ao ritmo da música.

Ao tempo en moitos barrios do país, os veciños organizaron festas nas rúas para celebrar o xubileu. O príncipe Carlos e a súa muller, Camila, duquesa de Cornualles asistiron ao mediodía a unha delas, no estadio Oval de Londres, onde se xoga ao criquet, que congregou centos de persoas.