Un raio provoca un incendio nunha vivenda en Nigrán sen causar danos persoais

Preto das 07:00 horas deste domingo, unha particular informaba de que unha vivenda na rúa Navas, en Priegue, Nigrán, estaba a arder por un raio que caera na casa.

Esta veciña relataba que caera un raio e que vía lapas por unha fiestra da vivenda. Aseguraba que se trataba dunha casa de alugueiro e que estaba baleira.

Ata o lugar, tras seren avisados polo 112 Galicia, acudiron de inmediato os membros do GES de Val Miñor. Igualmente foron informados os Bombeiros de Baixo Miño, de Vigo, a Garda Civil e a Policía Local.

Os membros do GES confirmaron a extinción do lume, indicaron que o incendio fora provocado por un raio que caera na vivenda. Ardeu o sistema eléctrico e toda a vivenda viuse afectada polo fume.