Un novo galeón participará na romaría viquinga de Catoira este verán

O Úrsula foi durante anos o barco empregado polos viquingos da Asociación Ateneo para invadir as Torres do Oeste en Catoira. Este vello barco de madeira que resistía a romaría cada verán non puido  sobrevivir os temporais do inverno de 2019.
 

"O primeiro desembarco deste barco foi no 2002 o tempo fixo o seu traballo e decidiu que se acabou e non hai por onde collelo e no 2019 tivemos que poñelo aquí e ir desmontando", di Miguel Ángel Arriaga, presidente.

Os socios do colectivo cultural metéronse a restaurar un antigo bateeiro para convertelo nun 'knorr' de 17 metros de eslora que queren que sexa o emblema da festa xa este verán. A nova nave viquinga mantén o mascarón de proa e a vela do Úrsula pero non será de madeira.

"É bastante máis grande que o Úrsula, ten máis envergadura, máis estilo viquingo... velo pola ría vai impoñer".
"Fóisenos un pouco das mans, é un gran barco que vai ser a envexa".
"Falamos dun presupuesto inicial duns 40.000 euros", explica Fernando Rial. Vicepresidente do Ateneo.
 

Os pouco máis de 130 socios do Ateneo buscan financiamento para poder rematar o proxecto. Contan coa colaboración este domingo do actor Carlos Blanco.

"Actuará o domingo dez, ás sete da tarde no auditorio de Catoira e necesitamos desesperadamente encher o auditorio, porque non hai outra", di o presidente.

O nome aínda está por decidir, sexa o Úrsula 2 ou Valhalla, paraíso dos viquigos, o novo galeón deberá estar rematado a mediados de xuño.