Ferido un mozo de 17 anos tras saltar ao Lérez dende unha ponte
O adolescente permanece na Unidade de Coidados Intensivos é o seu prognóstico é reservado
Un rapaz de 17anos saltou dende a Ponte das Palabras contra as 8 da tarde de onte e o resultado foi dramático. Os feitos, segundo a Policía Nacional de Pontevedra que se fixo cargo da investigación, aconteceron do seguinte xeito:
Varios rapaces, segundo unha testemuña que despois se lanzou ao río a socorrer a vítima, falaban e planeaban un salto dende o centro da ponte xusto á hora da preamar, aínda que nesta zona río dentro as mareas non son tan salientables. A profundidade tampouco semella suficiente.
El advertiulles que tiveran coidado e que non fixeran tal cousa, pero eles contestáronlle que sabían o que facían. Probablemente algún máis tiña previsto facelo pero tras ver que o primeiro saltaba dende máis de 20 metros e non saía a flote non o fixeron.
O home que lles advertira e un policía nacional de paisano que paseaba pola zona metéronse no río pero non foron quen de atopalo. A chegada dos equipos de emerxencias foi fundamental. Os mergulladores dos Bombeiros de Pontevedra viñeron nunha embarcación e rescatárono medio inconsciente entre pólas e unhas rochas. Puideron reanimalo parcialmente e foi trasladado de urxencia en ambulancia ata o Hospital Montecelo.
O menor de idade permanece ingresado na UCI con prognóstico reservado.
