Feridos cinco bombeiros no incendio de Barreiros que obrigou a cortar a A-8
Os brigadistas tiráronse ao río tras quedar atrapados polas lapas nun cambio brusco de vento
O tráfico na autovía xa está restablecido e o lume queimou máis de 20 hectáreas
Cinco bombeiros da brigada helitransportada de Castromaior feríronse durante os traballos de extinción dun incendio con dous focos activos que obrigou na tarde deste domingo a cortar a A-8 no concello de Barreiros.
Quedaron atrapados polas lapas nun cambio brusco de vento e tiráronse ao río para salvar a vida. Sufriron queimaduras de diversa consideración, polo que os evacuaron a centos sanitarios.
O incendio comezou sobre as 16:15 horas nas zonas de San Caetano e de Vilamar, entre a autovía e o río Masma, na parroquia de San Xusto de Cabarcos. As primeiras estimacións superan as 20 hectáreas queimadas.
Corte da autovía
O corte de tráfico realizouse á altura da rotonda da Cruz do Lobo. Axentes da Garda Civil con persoal de conservación de estradas regularon o paso de vehículos para desvialos á N-634.
Nesta estrada tamén houbo incidencias xa que a circulación estivo condicionada pola densa fumareda. Medio Rural mobilizou para a extinción do lume forestal un técnico, tres brigadas, oito motobombas, tres pas, tres helicópteros e seis hidroavións. Tamén chegaron desde Asturias efectivos da BRIF.
