Un incendio nun alboio de Moraña queima toda a leña do inverno

Un incendio no alboio dunha casa do lugar de Suigrexa, en Moraña, deulles un bo susto aos donos da propiedade e aos veciños da aldea. O fume e as lapas eran tan espectaculares que se vían desde varios puntos do lugar. Foi pouco antes da medianoite do luns ao martes, e foi grazas ao traballo dos propietarios da vivenda, de veciños e dun amplo dispositivo de emerxencias, que hoxe o poden contar sen lamentar danos persoais e ante poucos danos materias. 

Sergio Abal, neto da dona da casa, conta que foi a súa curmá que estaba vendo a televisión cando, de súpeto, a casa quedou sen luz  e viu o reflexo do lume na ventá.

Enrique Búa, membro de Protección Civil de Moraña di que "cando chegaron os donos da casa xa estaban traballando para apagar o lume e eles axudaron a arrefriar a zona ata que chegaron os bombeiros". 

A intervención durou aproximadamente dúas horas, momento en que conseguiron arrefriar a zona. Foi un traballo exhausto porque a madeira, uns 7.000 quilos de leña, tiña moita carga térmica.

Son sabedores da sorte que tiveron, o lume non chegou a este palleiro que estaba literamente ao lado da leña, tampouco se estendeu ao baixo da casa onde está a caldeira, puideron tamén sacar o cabalo san e salvo.

Sen coñecer aínda a orixe do lume, todo quedou nun susto que tardarán en esquecer e que unicamente os obrigará a cambiar o pendello e a limpar unha parede.