Un incendio causa danos nas instalacións da piscina de Teis en Vigo
Un incendio causa danos nas instalacións da piscina de Teis en Vigo
As lapas comezaron no cuarto de contadores eléctricos o sábado pola noite
Vai ser preciso baleirar a auga da piscina e realizar unha limpeza industrial
As instalacións deportivas de Teis pecharán durante un tempo
Unha densa columna de fume que saía da piscina municipal de Teis en Vigo alertou os veciños durante a noite e a madrugada do sábado ao domingo. As lapas orixináronse no cuarto de contadores eléctricos.
Unha muller que realizaba traballos de limpeza nas instalacións foi a que avisou pasadas as once da noite de que comezaba un incendio tras percibir un forte cheiro a fume.
Os bombeiros de Vigo desprazaron tres vehículos á zona e contras as tres da mañá remataron cos labores de extinción.
O foco do incendio situouse no cuarto de contadores eléctricos no baixo da instalación, que resultou con graves danos polo fogo e o fume. Parte da fumareda disipouse polo baixo do edificio e outra gran cantidade pola área da piscina, o ximnasio, os vestiarios e a zona administrativa.
Agora vai ser necesario retirar a auga da piscina pola contaminación sufrida e realizar unha limpeza de carácter industrial.
Os bombeiros atoparon atrancos para a extinción como a dificultade para ventilar a zona, xa que as fiestras da instalación carecen de sistema de apertura, polo que tiveron que utilizar ventiladores.
Non houbo ningún dano persoal. Agora investíganse as causas do sinistro.
