Un home e unha muller morren no incendio dunha vivenda en Tenerife

Arredor das seis e media desta mañá o Centro de Emerxencias das Canarias recibía unha chamada de alerta por un incendio na localidade tinerfeña de La Matanza de Acentejo. Os bombeiros lograron atallar as lapas na vivenda e sacar a un home e unha muller que estaban en estado inconsciente. Os efectivos sanitarios practicáronlles as manobras de reanimacións, pero non lograron reverter xa a parada cardiorrespiratoria de ningunha das dúas vítimas. Polo momento descoñécense as causas do incendio que queimou por completo a vivenda. 

Isto acontecía só 24 horas despois do sucedido en Alhaurín el Grande. No municipio malagueño seguen consternados polo incendio que na madrugada do día de Nadal provocou a morte de dous adolescentes de 15 e 16 anos. Os dous estaban no piso superior dunha casa da que non podían saír polo incendio que se desatou na planta baixa. Os veciños alertaron a Emerxencias de que había persoas atrapadas, pero os bombeiros só puideron rescatar os seus corpos xa sen vida. Todo apunta a que o lume se desatou por un posible curtocircuíto na planta baixa e que se estendeu rapidamente a toda a casa pola gran cantidade de material inflamable que había nese baixo.