OPINIÓN
Un fundador, un magnate e un investidor, por María Bastida
Elon Musk, George Soros e Jensen Huang coprotagonizando unha mesma historia. Demasiada tentación!
A telenovela de Nvidia segue a colear. E non se me ocorre mellor palabra para a crise da empresa que vende os chips dos que depende boa parte da intelixencia artificial. O seu fundador, Jensen Huang, dimitiu a semana pasada, despois de coñecerse informacións sobre relacións con empregadas e cunha empresaria sospeitosa de ter vínculos coa intelixencia chinesa.
A investigación segue aberta, pero Huang di que sería unha honra volver. Ten detrás unha petición con máis de cento oitenta mil sinaturas, a Elon Musk apoiándoo e mesmo a Trump dicindo que non lle importaría. Por que tanta présa por recuperalo? Porque cando alguén compra accións tamén está a confiar en quen dirixe a empresa. E hai investidores que cren que recuperar a Huang axudaría a recuperar esa confianza. Porén, o Consello foi rotundo: onte á noite, en plena presentación de resultados, o seu presidente deixou claro que non pensa devolverlle o posto. Polo de agora, os controis da empresa aguantan a presión.
Mentres tanto, ao mando está Colette Kress, a directora financeira. E aquí vén outra parte interesante. Nvidia axuda a financiar algúns dos que mercan os seus chips. E Kress acaba de dar unha pista. Onte á noite avisou de que seguirá apoiando os clientes, pero que a partir de agora mirará con lupa cada novo investimento e cada nova garantía. A billa non se pecha, pero apértase. E aí veremos que empresas de intelixencia artificial poden seguir investindo e cales precisan que alguén continúe financiándoas. Por iso importa quen manda en Nvidia: manda moito máis alá das súas fronteiras.
E que pinta Soros en todo isto? Segundo as cifras publicadas, a súa xestora vendera case unha quinta parte das súas accións antes de que estoupase a crise. Olfacto ou sorte? Nos mercados, ás veces custa distinguilos.
E no medio da telenovela, Nvidia duplicou os seus ingresos nun ano e superou o que esperaba o mercado. Huang ofrécese, o Consello di que non e os investidores fan contas. E Soros… Soros xa cobrou unha parte.