Un foguete de SpaceX estoupa cando realizaba probas en terra

Un foguete da compañía SpaceX, propiedade de Elon Musk, estoupou na noite do mércores cando realizaba probas de ignición en terra preparatorias para un próximo lanzamento.

A explosión produciuse ás 11 hora local e puido verse en directo, xa que as probas estaban a ser retransmitidas a través de diferentes redes sociais.

A compañía SpaceX informou a través da súa conta oficial na rede social X desta "grave anomalía" que sufriu a nave cando se atopaba nun banco de probas na StarBase, o porto espacial que a compañía ten para o desenvolvemento e a produción dos seus foguetes Starship, en Texas.

On Wednesday, June 18 at approximately 11 p.m. CT, the Starship preparing for the tenth flight test experienced a major anomaly while on a test stand at Starbase. A safety clear area around the site was maintained throughout the operation and all personnel are safe and accounted…

— SpaceX (@SpaceX) June 19, 2025

A empresa sinalou nas súas redes que se mantivo unha zona despexada de seguridade ao redor do lugar durante toda a operación e que todo o persoal se atopa a salvo. A empresa e as axencias de seguridade local traballan para asegurar a zona.

Afirmou ademais que non existen riscos para os residentes das comunidades contiguas e fixo un chamamento para que ninguén trate de achegarse á zona mentres continúan as operacións de seguridade.

O incidente da pasada madrugada súmase aos que sufriu o foguete Starship -co que a compañía do magnate pretende chegar a Marte- durante os últimos meses; o último deles o pasado 27 de maio, cando a nave, tras un lanzamento de proba, logrou alcanzar a órbita terrestre, pero rompeu a continuación e caeu ao océano tras perder combustible no que era o seu noveno voo de proba.