Un fallo eléctrico, posible causa do incendio mortal de Covadonga

Tras unha tráxica ponte de Reis, os veciños de Covadonga van retomando as súas rutinas, co susto aínda no corpo. O lume que lles custou a vida a Valentina e a súa amiga Edilma xerou o caos en todo o edificio.

"Fatal, fatal, aínda estou moi nerviosa". "Empezaron a golpes e a patadas na porta, a timbrar, pero non fomos capaces, así que xa empezamos a avisar os veciños para que foran saíndo", comentan dúas veciñas.

Dúas veciñas lesionáronse durante a fuxida, coas escaleiras esvaradías pola auga.

"Foi caótico poque temos mascotas, mete as mascotas no 'transportín', esperta a nena... baixa polas escaleiras, que estaban molladas... eu caín dúas veces porque perdín de vista a nena e púxenme nerviosa. Rompín o coxis", sinala Celia, inquilina do terceiro andar.

Unha veciña captaba co seu móbil o estado en que quedou o salón da vivenda, agora precintada pola policía nacional. Sospeitan que o lume empezou nun cuarto e atribúeno, en principio, a un fallo eléctrico. Os veciños quéixanse das deficiencias das instalacións. Trátase dun edificio de promoción pública no que a maioría vive en réxime de alugueiro.

"A calefacción non a podemos poñer porque é carísima. Andamos todos con bombonas, así que puido ser moito peor". "Debían pechar isto porque cando chove non funcionan os ascensores, cóasenos a auga por todas partes, por moito que acendas a calefacción nunca quece nada...", quéixanse dúas veciñas.

Repatriación

Familiares dunha das falecidas xa se desprazaron ata Ourense para facerse cargo do corpo. Os trámites de repatriación son custosos e non saben, aseguran os veciños, se poderán afrontalos.