Un dos cinco franceses evacuados do barco ten síntomas

Un dos cinco franceses repatriados este domingo desde España tras viaxar no cruceiro MV Hondius, identificado como un foco de infección por hantavirus, presenta síntomas compatibles coa enfermidade, segundo informa o primeiro ministro galo, Sébastien Lecornu.

"Cinco dos nosos compatriotas presentes no MV Hondius, foco de infección por hantavirus, foron repatriados ao territorio nacional. Un deles presentou síntomas no avión de repatriación", anunciou nunha mensaxe nas súas redes sociais.

Tras a súa chegada ao país de orixe na tarde deste domingo, os cinco pasaxeiros quedaron "inmediatamente en illamento estrito ata novo aviso" como medida de precaución sanitaria, engadiu o mandatario.

Lecornu precisou que están a recibir atención médica e serán sometidos a probas diagnósticas, así como a unha avaliación sanitaria completa.

O xefe do Executivo anunciou ademais que asinará hoxe mesmo un decreto destinado a activar un dispositivo de illamento específico para os casos de contacto, co obxectivo de protexer a poboación xeral.

Corentena de seis semanas

A ministra de Sanidade, Stéphanie Rist, detallou a situación epidemiolóxica e as medidas que se van adoptar nunha entrevista no telexornal da televisión pública France 2.

Ante este caso "potencial" de hantavirus, as autoridades francesas decidiron aplicar unha corentena de seis semanas para os cinco viaxeiros,.

"Consideramos que, dado que a incubación é bastante longa, pois dura seis semanas, debemos romper esta cadea de transmisión desde o principio", declarou Rist.

A ministra explicou que agardan os resultados das probas PCR e análises xenéticas, que estarán dispoñibles nas vindeiras 24 horas, para determinar se se trata efectivamente dunha infección por hantavirus.

Polo momento, van permanecer en illamento no hospital Bichat, antes de definir as condicións do illamento prolongado, fixado en 42 días.

Oito casos de contacto

Ademais destas cinco persoas, as autoridades sanitarias francesas tamén identificaron outras oito que voaron no mesmo avión que unha das primeiras vítimas do gromo, a muller do matrimonio neerlandés falecido polo virus: ela en Xohanesburgo (Suráfrica) e el no barco.

Eses oito casos clasificados como de contacto foron sometidos a probas diagnósticas. Malia que un deles presentou síntomas leves, todos deron negativo pero permanecen en illamento preventivo.

"Estas persoas foron identificadas, foron sometidas a probas, os seus resultados son negativos e, sobre todo, están en illamento, están illadas, e iso é moi importante. Repítoo: é realmente ao principio cando hai que actuar", recalcou.

"Non é comparable á covid-19"

Rist subliñou que este virus "non é comparable á covid-19", aínda que entende a preocupación pública debido á experiencia da pandemia.

Lembrou que a cepa andina do hantavirus está estudada tras as epidemias ocorridas na Arxentina e que existen investigacións científicas previas sobre os seus mecanismos de transmisión, que requirirían contactos estreitos e poderían producirse por vía aérea en proximidade, apuntou.

A ministra de Sanidade asegurou, ademais, que Francia dispón de reservas suficientes de máscaras e capacidade de diagnose mediante probas PCR realizadas polo Instituto Pasteur.

No entanto, admitiu que actualmente non existe unha vacina aprobada contra o hantavirus, malia que continúan as investigacións en fases iniciais.