Deteñen un home polo incendio intencionado nunha vivenda ocupada en Santiago

Bombeiros e Policía Nacional teñen poucas dúbidas: o lume que deixou totalmente destruída a casa situada no número 32 da rúa do Medio, en pleno barrio compostelán de San Pedro, foi, probablemente, intencionado.

O mozo que ata onte ocupaba a vivenda explicaba que "haberá catro ou cinco meses que vivimos aquí e onte veu, como outras veces anteriores bastante mal, o que se supón que era o dono da casa". Engade que "quedaramos nun trato e estábame pedindo máis cartos". 

Non había ninguén na casa cando comezou o lume: "Eu estaba no centro e chamáronme para dicirme que a casa estaba ardendo".

O arrendador era en realidade outro ocupante ilegal que lle tiña subarrendado o inmoble. "Primeiro había outra xente", di o veciño da casa contigua, "e uns íanlles alugando a outros".

Asegura que o ocorrido "viámolo vir, eu chamei o propietario, que está nunha residencia en Carballo, e díxome que agora cambiaron a pechadura e non poden facer nada ata que haxa unha orde xudicial para botar esa xente de aí".

O suposto autor foi detido nas proximidades, cando os bombeiros aínda traballaban arreo para evitar, sobre todo, que o lume se estendese ás vivendas contiguas.

A idea, explica desde o parque de bombeiros Ángel González, "foi en todo momento evitar que se estendese ás vivendas laterais, e como había moita carga de combustible dentro foi unha tarefa complexa, porque había lixo, mobles, moitos restos, mesmo na parte traseira onde estaba o xardín, que tamén ardeu".

Preto das dez da noite, os nove bombeiros que estaban de servizo conseguiron evitar a propagación cara ás casas laterais.

Esta mañá, os veciños aínda tiñan o medo no corpo. Aseguran que nos últimos meses, había na zona conflitos constantes e idas e vidas de xente relacionada coa venda polo miúdo de drogas. "Era raro que non viñera a policía unha vez á semana", explican.

O home detido polo incendio pasará ao longo da xornada de hoxe a disposición xudicial.