Un condutor ebrio atropela o alcalde de Sanxenxo nun aparcadoiro do municipio
Como consecuencia do impacto, Telmo Martín foi trasladado ao hospital cunha fisura na tibia da perna esquerda
O rexedor acompañaba o inspector xefe da Policía Local durante a rolda de control da movida nocturna
O alcalde de Sanxenxo, Telmo Martín, resultou ferido nunha perna tras ser atropelado no estacionamento da praza do Mar durante a manobra de marcha atrás dun vehículo. O condutor deu positivo nas probas de alcoholemia.
O suceso produciuse ás 6:00 horas deste domingo cando o alcalde acompañaba o inspector xefe da Policía Local durante a rolda de control da movida nocturna.
Como consecuencia do impacto, segundo explicaron fontes municipais, Telmo Martín foi derivado en ambulancia ao hospital de Montecelo cunha fisura na tibia da perna esquerda.
Aínda que xa recibiu a alta médica, o rexedor debe estar coa perna inmobilizada polo menos durante 10 días. O alcalde agradeceu a profesionalidade e a atención recibida pola Policía Local e polo persoal sanitario.
O alcalde de Sanxenxo nunha imaxe de arquivo
