Un concerto de proba do Sensoxenoma22 deixa evidencia do impacto da música en 300 xenes
As conclusións son preliminares pero abren unha gran expectativa para o concerto experimental do día 30 no Auditorio de Galicia
Presentáronse este mediodía no IDIS os resultados dun concerto de proba que se realizou en xuño e que recolleu mostras de máis de 100 persoas, entre enfermos de alzhéimer e os seus familiares. As conclusións son moi preliminares, pero abren unha grande expectativa cara ao gran concerto do Sensoxenoma22 que se vai celebrar o día 30 no Auditorio de Galicia. O que se demostrou é que a música se expresa en máis de 300 xenes e que o fai de xeito distinto en 100 deles no caso dos enfermos de alzhéimer.
"Temos unha colección de máis de 300 xenes que están relacionados coa música, e existen evidencias suficientes e contrastadas, que evidencian que teñen relación con algun aspecto da musicalidade e que, deses xenes, máis de cen están diferencialmente expresados en casos de alzhéimer", explicou Antonio Salas, investigador do IDIS e promotor do proxecto.
Acharon unha expresión diferente entre persoas sas e pacientes de alzhéimer, e ourtra tamén distinta entre músicos e público. Unha introdución alentadora previa a un concerto experimental en que se examinara o impacto da música no xenoma humano e que se financia, de momento, con fondos propios.
