Un camión que transportaba polos sofre un aparatoso accidente en Ourense

Aparatoso accidente o acontecido esta madrugada en Ourense. Sucedeu sobre as dúas da mañá. Un camión, que transportaba polos, saíu da estrada cando circulaba pola nacional 120, por razóns que se investigan.

O condutor non precisou asistencia médica malia que caeu por un noiro, á altura da praia fluvial da Antena. O que perdeu foi parte da carga.

Os operarios lograron retirar o vehículo sen necesidade de guindastre e recuperáronse parte dos polos, a maioría logrou sobrevivir ao impacto.

O accidente obrigou a cortar a vía durante un tempo, pero xa se restableceu a circulación despois de importantes retencións ao longo das primeiras horas.