Un Bergantiños con dez rabuña un punto do campo do Arenteiro

Arenteiro e Bergantiños empataron no campo do Couto (1-1). Mérito para o equipo de Carballo, que tivo a personalidade para refacerse dunha expulsión e lograr a igualada a tres minutos do final. 

O partido amosou o respecto que se tiñan os dous conxuntos. Moitas precaucións defensivas e poucas ocasións. As máis claras foron para o Arenteiro, nas botas do bergantiñán Romay. Un ex do Bergan como Martín Lamelas rematou á rede unha falta e puxo o 1-0 antes do descanso. 

Cambiou o xeito de xogar o Bergan no segundo tempo, pero no 63 atopouse cun xogador menos por expulsión de Tomé. Non lle perdeu a cara ao partido e no 87 o colexiado asubiou un penalti  que transformou Carlos López.