Un achado realizado en Galicia e por galegos pode facilitar a loita contra o cancro
A peculiariedade da descuberta é a súa capacidade de empregala no espazo e no momento máis eficaces
A orixe do cancro está no ADN. Un dos ADN presentes nos procesos tumorais é o chamado ADN tres vías. O Centro Singular de Investigación en Química Biolóxica e Materiais Moleculares da Universidade de Santiago deseñou un sistema molecular que incide neste ADN diana e agora descubriu ademais como activalo cando conveña máis.
"Está en liña cunha nova tendencia na farmacoloxía de desenvolver medicamentos que poden ser controlados de forma espacial e temporal. Isto quere dicir que podes activalos cando e onde queiras de tal forma que son máis efectivos e teñen menos efectos secundarios", explica o catedrático de química inorgánica da USC Miguel Vázquez López.
Miguel Vázquez López, investigador principal do proxecto, subliña o potencial que ten esta descuberta da man doutras investigacións internacionais en marcha.
"Eu creo que isto será no futuro unha diana na que se poidan basear novos medicamentos que poidan combater o cancro en primeira liña ou en combinación con outras terapias que se están implementando en oncoloxía como as terapias inmunolóxicas", vaticina.
O achado do CiQUS, realizado en Galicia por galegos e no que tamén participa o CINBIO da Universidade de Vigo, foi portada da revista da Sociedade Americana de Química.
