Un acertante da Bonoloto en Lalín gaña máis de dous millóns de euros

Histórico premio da Bonoloto en Lalín. Un acertante no sorteo celebrado onte selou o seu boleto nunha administración da capital do Deza e ingresará nada menos que 2 millóns de euros na súa conta. Polo momento todo son especulacións, nada se sabe do afortunado.

Investiu 3 euros e medio e recibirá algo máis de 2 millóns. O único acertante da combinación gañadora do sorteo da Bonoloto de onte selou o seu boleto nesta administración de Lotería de Lalín, na praza da Marina. Manuel, o propietario, sóuboo onte á noite e agarda ansioso a visita do agraciado ou agraciada.

Manuel entende que talvez o afortunado prefira manterse no anonimato, malia que un premio así sexa difícil de agochar. Pasoulle recentemente con outro agraciado ao que lle tocaron 50.000 euros e pediulles discreción.

Moitos clientes achegábanse esta mañá para comprobar os seus boletos. Ningun recoñeceu ser o afortunado, aínda que estaban alegres porque o premio quede na vila.

Polo momento son todo especulacións, pero os loteiros cren e confían que o afortunado ou afortunada pode ser algunha familia ou membro da comunidade educativa dalgún dos centros escolares que hai na contorna da administración.