Último día para votar por correo, con oficinas abertas polo menos ata as 10 da noite

Hoxe remata o prazo para que os electores que aínda non depositaron o seu voto nas oficinas de Correos poidan emitilo, e a entidade postal garante que "ninguén quedará sen votar" e abrirá máis aló das 22:00 horas se é necesario.

Aínda que a hora de peche oficial será as dez da noite, Correos sinalou que se nalgunha oficina hai persoas esperando a ser atendidas, así será "ata que se deposite o último voto" para as eleccións xerais deste domingo 23 de xullo.

Correos abrirá 654 oficinas en toda España e manterá a ampliación de horarios que vén aplicando desde o 13 de xullo.

A entidade postal puxo ao dispor dos electores o cen por cento das documentacións electorais, con todo e aínda quedaren solicitantes por recoller os seus sobres nalgunhas oficinas.

Ata o mércores había 282.000 documentos electorais pendentes de recoller. Os electores poden facelo hoxe e posteriormente emitir o seu voto na oficina.

Unhas 170.000 documentacións pendentes de recoller

Ao redor de 170.000 documentacións de electores que solicitaron o voto por correo están pendentes de ser recollidas nas oficinas postais.

Onte Correos informou de que eran 282.000 os solicitantes de voto por correo que tiñan pendente recoller a documentación electoral, polo que serían 112.000 persoas as que o fixeron nas últimas 24 horas.

En total, 2.622.808 de persoas solicitaron votar por correo estas eleccións do 23X, por tanto serían aproximadamente 2.453.000 as que xa recollerían a documentación, ben nos domicilios indicados ou ben posteriormente nas oficinas postais.  

Batendo marcas

A coincidencia dos comicios coas vacacións de verán elevou o número de peticións ao récord histórico de 2,6 millóns, un 80,45 % máis ca as solicitudes que se rexistraron nas eleccións xerais de xuño de 2016, que ata o de agora marcaran o máximo de voto por correo na democracia.

Os votantes terán que entregar sobres e papeletas electorais de maneira persoal, acreditando a súa identidade mediante o DNI ou outro tipo de documento oficial que permita a súa identificación antes de depositar o voto, segundo estipulou a Xunta Electoral Central por mor das fraudes denunciadas nalgúns puntos do territorio español durante as pasadas eleccións municipais e autonómicas.

Unha vez finalice o prazo para depositar o voto postal, Correos conservará os millóns de sobres e papeletas remitidos polos españois aos presidentes das mesas electorais ata o domingo 23, cando os trasladará aos 22.562 locais electorais distribuídos por todo o territorio.