Turismo reúne os destinos 'Starlight' de Galicia para preparar a eclipse do 12 de agosto

Hai que buscar un bo lugar onde mirar o ceo 12 de agosto, sabendo que a eclipse será total en Galicia por riba da diagonal que une Cabana de Bergantiños e Viana no Bolo.  Iso inclúe seis dos nove destinos starlight que temos no país.. Nos outros tres, verase a un 99 %.

"Tratamos de ofrecer un mapa de posibilidades para ver a eclipse. Este encontro que temos cos nove destinos 'starlight' é para ver que propostas teñen como lugares privilexiados para observar o ceo", dixo Xosé Merelles, o director de Turismo de Galicia.

"Queremos aproveitar esta oportunidade, e queremos organizar moitas actividades colalerais, porque se trata dun turismo de calidade e trátase da nosa proxección cara ao futuro, e aquí temos privilexio as zonas rurais", di Juan Anta, alcalde da Veiga, que foi o primeiro destino 'starlight' de Galicia.

O feito de que sexa importante non ter diante obstáculos nin accidentes xeográficos concede vantaxe ás zonas de máis altitude como Os Ancares, ou Trevinca.

Este xoves reuníronse para poñer en común axendas, actividades musicais, culturais, científicas...

"Queremos que a observación do fenómeno sexa o máis frutífera posible", dixo Merelles.

O director de Turismo de Galicia achegou os datos do Cluster de Turismo: as reservas en hostalería superan xa o 90 por cento das zonas de observación.