Trump di que un acordo de paz con Irán podería chegar esta fin de semana

 O presidente dos EUA, Donald Trump, asegurou este mércores que Washington e Teherán poderían alcanzar un acordo de paz "durante a fin de semana".

"Se sucede, e pode que non suceda, quen sabe?, pero se sucede, podería ocorrer durante a fin de semana", asegurou o mandatario ao ser preguntado polos medios durante un acto no Despacho Oval sobre a marcha das negociacións para acadar un acordo que poña fin ao conflito que iniciaron os EUA e Israel o pasado 28 de febreiro.

Ao ser preguntado polos mísiles balísticos lanzados por Irán contra obxectivos en países veciños, incluído o aeroporto de Kuwait, e a resposta estadounidense, que atacou unha estación de control terrestre militar na illa iraniana de Qeshm, Trump descartou que fosen accións que constitúan unha ruptura da tregua bilateral en vigor desde o 8 de abril.

"Houbo algúns incidentes, non foi gran cousa, pero tivémolo baixo control; cortámolo de raíz moi rapidamente, tal e como fai o mellor exército do mundo", engadiu.

"Non obstante, algunhas persoas poderían argumentar que (os iranianos) foron provocados lixeiramente, dado que nós tomaramos unha medida contundente por un motivo distinto. Así que, en certo modo, estaban respondendo en reciprocidade", engadiu o magnate neoiorquino en aparente referencia ao ataque de buques que trataban de chegar a portos iranianos.

Trump xa dixera a semana pasada que tomaría unha decisión final acerca do borrador iraniano para un plan de paz, pero aparentemente enviou o texto de volta a Teherán con emendas relativas principalmente ao desmantelamento do programa nuclear iraniano.

Nunha entrevista publicada este mesmo mércores, o mandatario asegurou que Irán aceptou non desenvolver armas nucleares, aínda que ao mesmo tempo recoñeceu que a República Islámica podería "cambiar de opinión" en canto a un acordo para poñer fin á guerra.