Trump di non querer recorrer á forza en Groenlandia, pero insiste en comprala

O presidente dos EUA, Donald Trump, asegurou este mércores no Foro de Davos, ao falar dos seus desexos de anexionar a illa ártica de Groenlandia, que non quere recorrer á forza e non recorrerá a ela, pero insistiu en que quere "negociacións inmediatas" para comprala.

"Non teño por que recorrer á forza. Non quero recorrer á forza. Non recorrerei á forza", dixo.

Con todo, engadiu: "solicito negociacións inmediatas para volver discutir a adquisición de Groenlandia por parte dos Estados Unidos".

"Agora o que pido é un anaco de xeo, frío e mal situado, que poida xogar un papel vital na paz mundial e a protección do mundo", comentou.

Neste sentido comentou que tanto os Estados Unidos como outras nacións europeas adquiriran ao longo da historia outros territorios, polo que, segundo Trump, non había nada malo en comprar este territorio autónomo danés.

"Supón un interese fundamental de seguridade nacional para os Estados Unidos de América, e foi nosa política durante séculos evitar que as ameazas externas entren no noso hemisferio (occidental), e fixémolo con moito éxito", dixo antes de asegurar que Estados Unidos nunca fora tan forte como ata o de agora.

Sobre a compra deste territorio, que enervou a Unión Europea, Trump agregou: 

"Por iso, os presidentes estadounidenses tentaron comprar Groenlandia durante case dous séculos. Xa saben, durante dous séculos tentárono. Deberían conservala despois da Segunda Guerra Mundial".