Trump asegura que a guerra con Irán terminou a pesar de que Teherán non confirma un acordo

O presidente dos Estados Unidos Donald Trump asegurou este xoves: "A guerra con Irán terminou hoxe". Expresou optimismo sobre as negociacións en marcha con Teherán, aínda que medios estatais iranianos sinalaron que polo de agora non se alcanzou ningún acordo definitivo.

Durante un acto telemático de apoio a un candidato republicano a gobernador en Xeorxia, Trump afirmou que un pacto entre ambos os países é inminente e horas antes ordenara cancelar novos ataques contra obxectivos iranianos e suxeriu que as conversacións avanzaban favorablemente.

Pese ao optimismo expresado polo mandatario, as autoridades iranianas non confirmaron a existencia dun acordo e os medios estatais da República Islámica insistiron en que as negociacións continúan sen que se formalizase un acordo entre ambas as partes.

Previamente, Trump asegurou este xoves na Casa Blanca que alcanzara un grande acordo de paz con Irán, pendente de formalizarse, que tal vez se asine esta fin de semana en Europa, nun acto no que posiblemente non estea presente o republicano.

"Acabamos de alcanzar un grande acordo para resolver o conflito con Irán. Agora queda pendente a formalización, o cal debería completarse nos próximos días, e probablemente se leve a cabo unha firma, talvez en Europa", declarou Trump ante os xornalistas no Despacho Oval.

O mandatario adiantou que o vicepresidente estadounidense J. D. Vance será o que acuda á firma durante a fin de semana, xa que Trump estará a oficiar este domingo un evento deportivo na Casa Blanca polo seu 80 aniversario, antes de viaxar a Europa para asistir ao cumio do G7 a partir do luns.

As declaracións producíronse despois de varios días de enfrontamentos na rexión, incluídos ataques iranianos contra forzas estadounidenses e posteriores bombardeos de represalia ordenados por Washington contra instalacións militases iranianas preto do estreito de Ormuz.