Tres detidos pola aparición en Moaña dun vigués ensanguentado nunha gabia

A Policía Nacional detivo nas últimas horas tres persoas supostamente relacionadas coa aparición en Moaña dun veciño de Vigo ensanguentado e con múltiples golpes nunha gabia das inmediacións da Autovía do Morrazo.

O home apareceu na tarde do domingo na beira da estrada con sinais de violencia e asegurando ser vítima dun secuestro.

As primeiras investigacións apuntan a unha suposta pelexa entre persoas coñecidas desenvolvida en Vigo. Posteriormente, trasladaron o ferido ata a parroquia de Meira, en Moaña, onde o abandonaron.

Tras ser localizado, os servizos de emerxencias trasladaron o home a un centro hospitalario para recibir asistencia médica.