Trasladada ao HULA unha muller de 92 anos tras sufrir un accidente en Guntín

Catro persoas quedaron feridas de diversa consideración logo dun choque frontolateral que se produciu este sábado a primeira hora da tarde na localidade de Lousada, no concello de Guntín, na LU-612, unha vía comarcal que une Lugo e Portomarín.

No vehículo que ía cara a Lugo viaxaban tres persoas, entre elas unha muller de 92 anos; no vehículo que ía no sentido contrario viaxaba un home que quería torcer á esquerda cara á beirarrúa na que está a farmacia e un dos supermercados que hai nesa localidade.

Todos os ocupantes dos vehículos foron trasladados ao HULA en ambulancia

Ata o lugar do accidente tamén se desprazaron cinco gardas civís e un tenente, que estiveron atendendo aos feridos, regulando o tráfico, levantando un atestado e tamén tratando de clarexar os motivos do accidente.

Os veciños de Lousada levan anos reclamando que se tomen medidas que obriguen a respectar o límite de velocidade nunha travesía na que hai moitas persoas maiores e que é moi transitada debido a que nela está a escola, o centro médico, a farmacia, varios supermercados, comerciais agrícolas e bares.