Transportistas galegos instan o Goberno a declarar nulas as prórrogas da AP-9

A patronal galega de transporte de mercadorías por estrada Apetamcor remitiu este martes un escrito ao Consello de Ministros reclamando unha revisión e unha declaración de oficio a nulidade das dúas prórrogas da concesión da AP-9.

Apetamcor considera nun comunicado divulgado este martes que tanto a prórroga de dez anos aprobada en 1994 polo Goberno de Felipe González como a posterior, decretada pola Administración presidida por José María Aznar en 2000, que prolongou 25 anos máis o prazo de explotación, son nulas "de pleno dereito".

Así o indicou o avogado de Apetamcor, Xoán Antón Pérez-Lema, e indicou que esa interpretación, avalada na súa opinión pola xurisprudencia europea, permitiría proceder ao rescate para os poderes públicos desa infraestrutura sen ter que indemnizar a concesionaria polo lucro cesante e reduciría enormemente a contía desta operación.

Pérez-Lema citou un recente informe elaborado pola Universidade da Coruña (UDC) que fixa entre 900 e 1.200 millóns o custo de asumir os danos e perdas da concesionaria, moi por baixo dos 2.356 millóns que calcula a Xunta e máis lonxe aínda dos ata 6.000 millóns cos que chegou a especular o Ministerio de Transportes.

O posible custo desta operación, relatou o avogado, foi unha das principais razóns polas que o Executivo central se opuxo a acometela; razón pola que cre que, baixo estes preceptos, podería exercerse máis "presión social" para que se atendese á solicitude da nulidade das dúas prórrogas da autoestrada.

De forma paralela a esta petición, Apetamcor tamén reclama ao Goberno asumir a responsabilidade patrimonial pola cobranza indebida de peaxes desde 2013 en caso de declararse nula a concesión, de maneira que os usuarios que conserven tíckets ou facturas poidan pedir tamén a devolución destes importes.

No caso de que a Administración central non atenda aos seus requirimentos, Apetamcor prevé elevar as súas reclamacións mediante un recurso contencioso-administrativo ante o Tribunal Supremo.

Apetancor cuestiona a estratexia de Fegatramer para porlle fin a concesión da AP9

División no proceder da patronal galega

Precisamente outra das asociacións da patronal do transporte en Galicia, Fegatramer, anunciou recentemente a súa intención de acudir ao Tribunal Supremo para esixir por vía xudicial a nulidade destas dúas prórrogas.

Con todo, Apetamcor manifestou a súa desconformidade con esta maneira de proceder, ao considerar que esta solicitude previa ao Goberno é o "camiño correcto" e "evita custos innecesarios e precipitacións sen garantías", segundo a xerente da organización, Natalia Blanco.

"Podería ser máis garantista para unha reclamación futura. Por iso quixemos facer ese paso previo", agregou Blanco.