Transportes adxudica o estudo do trazado do AVE entre O Porriño e Portugal

O Ministerio de Transportes e Mobilidade Sostible adxudicou por 835.384 euros un contrato de servizos para redactar os estudos do tramo do eixe atlántico entre O Porriño e a fronteira portuguesa, na provincia de Pontevedra.

O obxectivo do contrato é definir o trazado entre o tramo que se está analizando no estudo informativo da saída sur de Vigo, na actualidade en redacción, e a infraestrutura que están a definir as administracións portuguesas ao sur do río Miño, explica o ministerio.

Para iso, os traballos estrutúranse en dúas fases, a primeira delas un estudo de viabilidade, que incluirá unha análise preliminar de alternativas, un estudo de demanda e unha análise custo-beneficio desde unha perspectiva socioeconómica, co fin de apoiar a toma de decisións sobre a actuación.

En segundo lugar haberá un estudo informativo, que incorporará a análise das distintas alternativas de trazado "co nivel de detalle necesario" para o seu sometemento a información pública, avaliación de impacto ambiental e a súa aprobación. Inclúe a prestación de servizos de enxeñería (consultoría e asistencia) para a realización dos mencionados trámites de información pública e audiencia ás administracións, análises de alegacións e obtención, no seu caso, da declaración de impacto ambiental, ata a aprobación definitiva do estudo informativo.

"Este estudo representa un novo avance na construción dunha conexión internacional estratéxica para Galicia, España, Portugal e Europa, ao dar continuidade ao eixe atlántico de alta velocidade entre A Coruña e Lisboa", resalta Transportes. Ademais, asegura que "reafirma o compromiso do Ministerio de Transportes e Mobilidade Sostible con Galicia e, en particular, con Vigo", en cuxa contorna se están analizando tanto a mellora da súa conexión coa rede nacional de alta velocidade como actuacións técnicas sobre a infraestrutura na área de Redondela ou o estudo complementario adxudicado recentemente para a variante de Cerdedo.

"O inicio deste estudo informativo supón un novo paso para impulsar as conexións ferroviarias entre España e Portugal, de acordo co compromiso referendado por ambos os países no XXXV Cumio Hispano-Portugués, celebrado en Faro no mes de outubro de 2024", sinala o Goberno central. Engade que a actuación responde aos obxectivos da Estratexia de Mobilidade Sostible, Segura e Conectada 2030, encamiñada a mellorar a cohesión social, o crecemento económico e a liquidar os problemas de mobilidade.