Tráfico prevé 5,7 millóns de desprazamentos pola ponte do Pilar

A Dirección Xeral de Tráfico (DXT) poñerá en marcha entre as tres da tarde deste venres e as doce da noite do luns un operativo especial para dar cobertura aos 5,7 millóns de desprazamentos que prevé nas estradas españolas pola festividade do Pilar.

Tráfico espera unha media de 1.440.000 movementos de longo percorrido cada un deses días fundamentalmente cara a zonas de descanso en costas e montañas, segundas residencias e poboacións que celebran as súas festas patronais sobre todo en Zaragoza e na Comunidade Valenciana, onde o venres é festivo.

Para garantir a seguridade e a fluidez da circulación a DXT contará coa máxima dispoñibilidade dos seus medios humanos, axentes da Agrupación de Tráfico da Garda Civil e persoal da Unidade de Medios Aéreos, dos centros de xestión e de mantemento de equipos e instalación de medidas na estrada, alén de servizos de emerxencias.

Así mesmo con todos os medios técnicos como radares fixos e móbiles de control de velocidade, helicópteros, drons e cámaras para controlar o uso de móbil e do cinto de seguridade, informa a DXT.

A DXT aconsella consultar o estado das estradas e as posibles incidencias a través das súas canles de información, a páxina web dgt.es, redes sociais como @DGTes en X, boletíns informativos en radio e televisión e o teléfono 011.