Tradición e modernidade na inauguración do Mundial máis controvertido da historia

A tradición qatarí e a modernidade mesturáronse na cerimonia de inauguración do Mundial de 2022 no estadio Al Bayt, unha das xoias que se ergueu para acoller o primeiro partido. 

O primeiro Mundial da historia en Oriente Medio deixou un acto rápido, apenas media hora, en que se amosaron as raíces do país, a vinculación co deserto e unha mensaxe de unidade e modernidade.

Estivo presidido polo emir Sheikh Al Thani e asistiron os máximos dirixentes do fútbol mundial, encabezados polo suízo Gianni Infantino. O actor Morgan Freeman tivo un papel importante ao comezo e logo viñeron os cantantes Jung Kook e Fahad Al Kubaisi. 

Marcel Desailly, campión con Francia no 98, foi o que trouxo o trofeo da Copa do Mundo que gañou a selección francesa hai catro anos en terras rusas.