Tender a roupa cara a rúa, unha tradición con risco de sanción
É unha práctica moi estendida, pero prohibida en moitas ordenanzas municipais
En Barbadás, a ordenanza de convivencia contempla multas de ata 300 euros
Non fai falta andar moito para captar imaxes de roupa secando nas fachadas.
"Aquí todo o mundo a tende nos balcóns. Isto non ten nada que ver con Torremolinos", di un veciño de Barbadás.
O certo é que están incumprindo a norma, concretamente, o capítulo de ornato público da ordenanza de convivencia cidadá de Barbadás.
Daniel Rey, tenente alcalde de Barbadás: "Basicamente é por unha cuestión de convivencia e de hixiene. Se hai denuncia, constitúe unha infracción leve, cunha sanción que pode oscilar entre os 60 e os 300 euros".
O decreto de habitabilidade de vivendas da Xunta tamén indica que os tendais non deben estar á vista. "Bonito non é. Se a persoa ten necesidade de facelo, non digo nada, pero bonito non é". "Nas casas máis ocultas non ten importancia, pero se vas por unha xeral...", comentan dúas mulleres.
O caso é que pouca xente é consciente desas restricións nin do risco de sanción. E hai máis cousas. Tampouco se pode regar a calquera hora, nin deixar os testos na ventá, polo risco de caída.
