Tejero reprochoulle ao Goberno que o enviase a unha cela "chea de humidade" en Mugardos
Segundo o letrado, o tenente golpista Antonio Tejero tiña reuma e anemia
Castelo da Palma, en Mugardos
O tenente coronel da Garda Civil Antonio Tejero criticou que o Goberno de Leopoldo Calvo Sotelo o trasladara a unha cela "chea de humidade" no castelo da Palma, no municipio de Mugardos, "a 650 quilómetros" de Madrid e sen que un xuíz o decidira.
Fíxoo o seu avogado nun escrito dirixido ao Ministerio de Defensa e datado o 28 de xullo de 1981, meses despois do intento de golpe de Estado, e que agora o Goberno desclasificou co nome 'Traslado de peticións dos avogados dos condenados'.
O seu avogado emitiu "protesta polas infraccións procedementais cometidas na tramitación do proceso", reprochando que o traslado se fixo "de forma claramente anticonstitucional".
"O Regulamento de Establecementos Penais Militares non atribúe ao Ministerio de Defensa competencia para trasladar pola súa propia iniciativa, senón que a iniciativa en todo caso ten que ser da autoridade xudicial competente", indicou.
Segundo o letrado, Tejero atopábase "enfermo, afectado de reuma, nunha prisión militar chea de humidade e, así mesmo, de anemia", alegou. E no mesmo escrito manifestou que foi "testemuña da sorpresa do xuíz especial instrutor cando se decatou do traslado por televisión".
O seu avogado pediu que o trasladasen a Alcalá de Henares
"O traslado a máis de 650 quilómetros do domicilio do seu letrado e do domicilio do tribunal, orixina unha evidente indefensión. Non foi acordado pola autoridade xudicial competente, senón por un órgano do Poder Executivo manifestamente incompetente, en virtude dun acto nulo de pleno dereito", insistiu.
A defensa de Tejero apelou á "necesidade, como o resto dos letrados defensores, de estar en permanente consulta e cambio de impresións co seu cliente". "E esa necesidade, que calquera dos restantes letrados ten facilmente resolta por atoparse todos os procesados no mesmo territorio xurisdicional de Madrid, será un grave obstáculo, dada a distancia a que Tejero se atopa, tras o seu arbitrario e inconstitucional traslado ao castelo da Palma, creándose desta forma unha total indefensión, aberrante en calquera Estado de dereito", apostilou. Por iso, reclamou que se trasladase a Tejero ao Establecemento Penal Militar de Alcalá de Henares, "onde tiña que estar na actualidade".
