UXT e CCOO acordan convocar unha folga xeral de 24 horas

Os sindicatos CCOO e UXT acordaron a convocatoria dunha folga xeral de 24 horas para este outono co obxectivo de reivindicar salarios dignos e garantir o acceso a unha vivenda digna, unha medida que deberá ser ratificada polos seus respectivos órganos máximos de dirección, segundo anunciaron ambas as organizacións nun comunicado.

As centrais sindicais dan este paso tras o rexeitamento no Congreso dos Deputados aos decretos leis sobre vivenda o pasado venres. Ante esta situación, decidiron incorporar as reivindicacións do ámbito laboral ás mobilizacións sociais, en confluencia con movementos de inquilinos e asociacións veciñais.

A data definitiva da xornada de paro de 24 horas perfilarase de xeito conxunto con estas plataformas sociais e o Sindicato de Inquilinas, co obxectivo de mobilizar as persoas traballadoras para secundar este paro xeral de 24 horas, polo dereito á vivenda e salarios dignos para pagala.

"As manifestacións da pasada fin de semana mostraron a forza desa demanda, e a resposta debe construírse entre todas as organizacións que a sosteñen", argumentan.

Con esta convocatoria, CCOO e UXT apelan tanto ás organizacións empresariais, para que desbloqueen a negociación colectiva e aseguren retribucións que cubran bens básicos, como ás administracións públicas con competencias na materia para que apliquen de forma efectiva a lexislación sobre o dereito á vivenda.