Sumar pide recoñecer o Estado palestino na negociación para o goberno de coalición

Sumar incluíu na negociación co PSOE para reeditar un goberno de coalición que unha das primeiras medidas do novo Executivo sexa o recoñecemento do Estado palestino de forma unilateral e incondicional, sen esperar a que haxa unha posición común na Unión Europea.

Así o avanzou o portavoz de Sumar, Ernest Urtasun, nunha conferencia de prensa en Madrid este luns, en que presentou xunto á portavoz parlamentaria, Marta Lois, tres iniciativas referidas ao conflito entre Israel e Hamas: unha proposta de declaración institucional do Congreso, unha proposición non de lei e un documento político da súa formación.

"Cremos que chegou o momento de que España recoñeza o Estado palestino de forma unilateral, de forma incondicional e de forma urxente, como unha contribución esencial á resolución do conflito e á paz", sinalou Urtasun ao destacar este punto do documento político presentado por Sumar.

Lembrou que Suecia e Grecia xa aprobaron o recoñecemento do Estado palestino, polo que España podería facelo sen esperar a que os Vinte e sete acorden unha postura respecto diso.

Neste sentido, Urtasun indicou que cre que o presidente do Goberno en funcións, Pedro Sánchez, é proclive ao recoñecemento, pero dentro dos Vinte e sete, polo que Sumar ao que o insta é a un recoñecemento unilateral sen esperar á decisión conxunta.

Tamén lembraron Urtasun e Lois que desde 2014 o Congreso xa se manifestou a favor de recoñecer a Palestina como Estado e que o que falta é que o Goberno o faga efectivo.

"Queremos que sexa unha das primeiras medidas que se tome por parte do próximo goberno de coalición", sinalou Urtasun, tras indicar que a súa postura xa estaba incluída nos primeiros contactos para reeditar a coalición de goberno. 

Sánchez: “A única maneira de poñer fin ao conflito é o recoñecemento de dous estados"

O presidente do Goberno español, Pedro Sánchez, instou á UE para “traballar por evitar unha escalada de violencia” en Oriente Medio, que "está en chamas", e a manter a axuda humanitaria, especialmente ás persoas da Franxa de Gaza.

Sánchez expresouse así nunha breve intervención na inauguración do cume de líderes sobre a necesaria colaboración nos Balcáns Occidentais para facilitar o seu ingreso na UE, na que tamén se está analizando o enfrontamento entre Israel e Hamas.

“Debemos traballar en evitar unha escalada da violencia na rexión e redobrar os nosos esforzos para lograr unha solución pacífica ao conflito”, dixo Sánchez, para quen “a única maneira de poñer fin ao conflito é o recoñecemento de dous estados para que poidan convivir en paz e seguridade”.

Este debate chega un día despois das manifestacións que percorreron o centro das cidades de Madrid e Barcelona, ás que asistiron representantes de Podemos, IU e Más Madrid. Desde Sumar din que Pedro Sánchez é favorable a este recoñecemento e piden que se faga con independencia da Unión Europea.

Podemos busca perfil propio nas esixencias a Pedro Sánchez. A formación morada reitera o pedimento de Ione Belarra para que o Goberno leve a Israel ante a Corte Penal Internacional por crimes de guerra. "Pedro Sánchez como Presidente de quenda do consello da Unión Europea ten que facer máis. O que está facendo non é dabondo".

Desde o PSOE, Emiliano García-Page reclámalle a condena de todo tipo de terrorismo. "Neste mundo en que vivimos no que se fai política de todo, ao mesmo tempo que condenamos a guerra sexamos tamén valentes para condenar todo acto de terrorismo". E di que para pedir proporcionalidade hai que estar lexitimado.