Rusia celebra o 80 aniversario da vitoria cunha parada militar na praza Vermella

A parada militar polo 80 aniversario da vitoria do Exército Vermello contra a Alemaña nazi na Segunda Guerra Mundial comezou este venres pola mañá na praza Vermella de Moscova.

O desfile, presidido polo comandante supremo das Forzas Armadas e xefe do Kremlin, Vladimir Putin, comezou ás 10:00 hora local. O presidente proclamou que o seu país nunca esquecerá as leccións da contenda mundial, na que a URSS, perdeu 26 millóns de persoas, oito millóns deles soldados e acusou a Ucraína de "manter vivo" o nazismo.

Aínda que Kiív non se sumou oficialmente á tregua unilateral de tres días declarada por Putin, os drons ucraínos non augaron a festa do Kremlin e desde a véspera non sobrevoan territorio ruso.

Na tribuna estaban presentes líderes dunha trintena de países, incluídos A China, O Brasil, Exipto, Eslovaquia, Venezuela e Vietnam, entre outros, ademais de veteranos de guerra rusos, estadounidenses e israelís.

En total, desfilaron máis de 10.000 soldados rusos, aos que se uniron militares de trece países, incluída unha garda de honra chinesa.

Putin promete combater o nazismo 

O presidente ruso, Vladimir Putin, prometeu este venres, durante a parada militar seguir combatendo o nazismo, acusando directamente a Ucraína. Ao evento asistiron unha trintena de mandatarios estranxeiros, pero só un dirixente occidental, o primeiro ministro eslovaco, Robert Fico.

"Rusia foi e será unha barreira infranqueable para o nazismo, a rusofobia e o antisemitismo, loitará contra as brutalidades dos promotores desas ideas agresivas e destrutivas", dixo Putin durante a súa intervención desde unha tribuna instalada na praza Vermella diante do Mausoleo de Lenin.

Putin, que pediu un minuto de silencio en memoria dos caídos, asegurou que "a verdade e a xustiza" están do lado ruso á hora de combater o nazismo, acusando ao presidente ucraniano, Volodimir Zelenski.

"Todo o país, a sociedade, o pobo apoian os participantes na operación militar especial. Sentimos orgullosos da súa valentía e tesón, esa forza de espírito que nos outorgou sempre e unicamente a vitoria", dixo.

Ao mesmo tempo, rendeu tributo ao papel xogado polos países aliados na derrota das tropas hitlerianas, recalcando que Rusia valora "altamente a contribución á nosa vitoria común dos soldados dos exército aliados, os participantes na resistencia, o valente pobo chinés e a todos aqueles que combateron en pos dun futuro en paz".

Putin e Xi, inseparables

Putin compareceu na tribuna entre o líder chinés, Xi Jinping, e o centenario veterano soviético Iván Martinushkin, a última testemuña con vida que participou na liberación do campo de concentración de Auschwitz a mans do Exército Vermello o 27 de xaneiro de 1945.

Putin e Xi Jinping amosaron o seu achegamento con continuos comentarios entre eles sobre as unidades e os equipos militares que desfilaban polo empedrado da praza. A proximidade dos líderes mantívose incluso durante a ofrenda floral ante a tumba ao soldado descoñecido.

A esta conmemoración asistiron o brasileiro Lula da Silva, o venezolano Nicolás Maduro e o cubano Miguel Díaz-Canel, e tamén dirixentes autoritarios como o presidente de Guinea Ecuatorial, Teodoro Obiang; o líder da xunta militar de Birmania, Min Aung Hlaing, e o presidente bielorruso, Alexandr Lukashenko.

Á tribuna tamén foron convidados veteranos de guerra estadounidenses e israelís, pero non houbo representación dos países aliados da Unión Soviética na contenda mundial, que si asistiron ao 50 e 60 aniversario en 1995 e 2005.

Demostración de forza militar 

Polo empedrado da histórica praza marcharon este venres unhas 130 máquinas de guerra, entre elas os lendarios tanques soviéticos T-34 e as pezas de artillería autopropulsada SU-100, empregados durante a Segunda Guerra Mundial.

Unha das estrelas da parada serán os mísiles balísticos intercontinentais Yars, que teñen un alcance de ata 12.000 quilómetros. Tamén se puideron ver T-90M Proriv, o primeiro tanque ruso cunha caixa automática de velocidades; a peza de artillería Malva de calibre 152, montada sobre un chasis BAZ con oito rodas; os mísiles balísticos Iskander e o novo transporte blindado Kurganets-25.

A novidade foron os drons, que Rusia continúa empregando na Guerra de Ucraína. En particular, desfilaron os Gueran-2, os drons espía Orlán e os kamikaze Lantset, que marcharon a bordo de camións todoterreo Kamaz.