Stellantis aposta de novo por Vigo: Peugeot montará o novo motor Turbo 100 desde maio
Trátase dun motor de terceira xeración que incorpora un 70% de compoñentes novos en termos de valor, incluíndo a cadea de distribución, o turbocompresor, ou o sistema de inxección
Imaxe de arquivo da fábrica de Stellantis en Vigo (Europa Press / Stellantis)
A marca automobilística Peugeot anunciou que os seus modelos 208 e 2008, este último producido en Vigo, montarán a partir dos próximos meses o seu novo motor Turbo 100, de tres cilindros e 101 cabalos de potencia.
Tal como informou a firma nun comunicado, este novo motor de gasolina "eleva as sensacións e o rendemento a un nivel superior", para ofrecer "eficiencia e fiabilidade".
Segundo explican, trátase dun motor de terceira xeración que incorpora un 70% de compoñentes novos en termos de valor, incluíndo a cadea de distribución, o turbocompresor, o sistema de inxección ou o bloque cilíndrico.
Esta nova mecánica estará dispoñible no Peugeot 208 a partir de marzo e en maio no Peugeot 2008, fabricado en Vigo.
