Solidariedade cun hostaleiro de Burela boicoteado en Internet por antivacinas

Para quen esta campaña de Nadal está sendo especialmente difícil é para un hostaleiro de Burela.  O local, Contraste food&drinks de Burela recibe desde hai días ataques en Internet de antivacinas de toda España por unha mensaxe do seu propietario nas redes sociais cunha crítica á xente que non se vacinaba contra a covid.

A conta do establecemento segue a recibir as puntuacións máis baixas posibles, contestadas xa polo hostaleiro que indica que son falsas e están denunciadas. Recibe insultos e ameazas.

E todo porque el realizou un comentario no seu muro de Facebook cualificando de egoístas e irracionais os que non se vacinan. 

Tras coñecerse o seu caso, desatouse unha onda de solidariedade. Como contrapartida ao boicot que sofre está a recibir chamadas e comunicacións de hostaleiros e clientes co seu total apoio.

Tratan de contrarrestar as puntuacións negativas con outras positivas e con eloxios para o Contraste.