Polo menos 70 hectáreas queimadas xa nos incendios nas Pontes de García Rodríguez

A Consellaría do Medio Rural solicitou a activación da situación 2 de emerxencia nun incendio no concello coruñés das Pontes de García Rodríguez porque as lapas se achegaron ao lugar da Cuíña. O alcalde acaba de contarlle á Radio Galega que non foi preciso desaloxar á veciñanza e que o perigo pasou, polo menos polo momento.

O último balance oficial sitúa en 30 as hectáreas queimadas, ás que se suman outras 40 calcinadas na parroquia de Vilabella.

O rexedor pide non especular sobre como se orixinaron, á espera do que determinen os técnicos da Consellaría que se trasladarán hoxe ata a localidade. Pero Valentín González Formoso explica que o lume prendeu en 3 puntos situados a poucos quilómetros e case ao mesmo tempo: tamén ardeu no lugar de Gondré. 

"Custa crer que poida haber algún criminal que poida prender un lume coas condicións de forte vento que había e preto das casas porque sabía perfectamente o que podía pasar". 

O lume de Carballeda de Valdeorras calcina 120 hectáreas

Os efectivos dos equipos de extinción seguen traballando arreo no incendio forestal que se declaraba no municipio ourensán de Carballeda de Valdeorras, na parroquia de Casaio. Calcinou xa máis de 120 hectáreas, segundo a última información da Consellería do Medio Rural.

As lapas queiman máis de 50 hectáreas en Chandrexa de Queixa e 20 en Laza

Outro dos incendios activos en Galicia afecta a parroquia de Queixa, na localidade tamén ourensá de Chandrexa de Queixa, e supera xa as 50 hectáreas queimadas. O rexedor, Francisco Rodríguez, dicíalle á Radio Galega que non ten dúbidas de que foi intencionado.

Un cuarto incendio levou por diante polo menos 20 hectáreas noutro municipio ourensán, Laza, na parroquia de Camba.