Sofía e Mateo, os nomes preferidos en Galicia para a cativada
Entre Sofías e Mateos suman máis de 6.600, con todo aínda lles queda moito para acadar o 1.200.000 Antonios e Carmes, que son os nomes que máis se repiten entre a poboación española, sobre todo, entre os de máis idade
Á hora de elixir o nome que lles van poñer aos fillos, hai parellas que o teñen moi claro. Para outras é unha carreira de fondo, e non sempre se chega a consenso.
"Eu, eu prefería outro nome, pero ao final gustoume tamén Matilde, non sei, gustoulle á nai. Ten un significado de guerreira, e como para nós é unha guerreira, pois puxémolle Matilde", explica o pai de Matilde.
"Buscabamos un nome de 5 letras que funcionara ben en calquera idioma. Vivimos un tempo no estranxeiro e queriamos que funcionara en inglés, en francés e que non fose difícil", apunta a nai de Sofía.
E decidíronse por Sofía, que resultou ser o nome máis común entre as nenas que naceron no último lustro.
"Foi a posteriori que soubemos que era moi famoso e moi popular".
Tamén deron na diana cos nomes dos varóns da casa. Mateo e Lucas.
"Moita xente tivo a mesma idea".
E é que segundo os últimos datos do INE, Mateo encabeza a listaxe dos nomes máis frecuentres entre os nenos.
"Sabemos que sempre nos imos atopar con homónimos", recoñece o pai de Manuel e Martín
Entre Sofías e Mateos suman máis de 6.600, con todo, aínda lles queda moito para acadar o 1.200.000 Antonios e Carmes, que son os nomes que máis se repiten entre a poboación española, sobre todo entre os de máis idade.
