Soben os casos da covid pero a presión hospitalaria mantense arredor dos 450 ingresos
Soben os casos da covid pero a presión hospitalaria mantense arredor dos 450 ingresos
A cifra de pacientes críticos mantense en 15
No mes de xuño faleceron 56 persoas coa covid
As cifras da evolución da covid amosan unha repunta de casos esta última semana cun aumento da incidencia acumulada a 15 días nos maiores de 60 anos.
A presión hospitalaria aumentou nas últimas horas, a 438 ingresos, pero aínda así levamos tres semanas por debaixo dos 500 e cun descenso importante de pacientes críticos. Hoxe son 15 os ingresados nas UCI, e a única área que non ten pacientes coa covid en coidados intensivos é a de Ferrol.
Sobe a cifra de persoas con infección activa, que volven superar os 11.000, o dato máis alto deste mes. Nas últimas horas notificáronse 1.101 contaxios que non contemplan os positivos que se dan fóra dos grupos de risco que precisan seguimento médico.
A cifra de falecidos coa covid tamén descendeu nestas últimas semanas, aínda que seguen notificándose mortes a diario. Nas últimas horas computáronse tres falecementos de persoas contaxiadas, e no que levamos de xuño morreron 56 persoas.
A incidencia acumulada nos últimos 14 días en maiores de 60 anos tamén sobe despois de varias semanas en descenso. O informe do Ministerio de Sanidade deste venres notifica 781 casos por cada 100.000 habitantes desta idade, a semana pasada eran case 100 casos menos. Seguimos por enriba da media do Estado.