‘Sirat’ e 'Los domingos' lideran as candidaturas aos Premios Goya 2026
As dúas películas suman 24 candidaturas na 40ª edición dos galardóns
'Romería', da directora catalá Carla Simón, participada pola TVG e que foi rodada en Vigo, obtén seis candidaturas
Tamén figuran con candidaturas 'Decorados' e 'Rondallas', participadas pola TVG
'Sirat' conseguiu 11 candidaturas aos Premios Goya, incluídas as de película e director, á que aspira o cineasta galego Oliver Laxe.
Mentres, 'Romería', cinta da directora catalá Carla Simón participada pola TVG e que foi rodada en Vigo, obtén seis candidaturas aos Goya entre elas a de mellor actriz de elenco para a ourensá Myriam Gallego.
'Decorados' e 'Rondallas', participadas tamén pola TVG, logran tamén varias candidaturas
Esta edición tamén contará con outros nomeados galegos, como Mario Casas, que opta a mellor actor por 'Muy lejos', así como Tamar Novas ('Rondallas') en actor secundario e Miryam Gallego ('Romería') en actriz secundaria. 'Decorado', dirixida por Alberto Vázquez, competirá a mellor cinta de animación.
"Arrasou", chanceou o presentador Arturo Valls ao nomear as nomeacións de 'Sirat', que buscará ser a mellor película dos Goya con: 'La cena', 'Los domingos', 'Maspalomas' e 'Sorda'.
Oliver Laxe competirá na categoría de mellor director con Alauda Ruiz de Azúa ('Los domingos'); Aitor Arregi e José Mari Goenaga ('Maspalomas'); Carla Simón ('Romería') e Albert Serra ('Tardes de soledad').
Carla Simón, no centro da imaxe, na entrega do premio de Novos Cinemas
Maiores candidaturas
'Los domingos', de Alauda Ruiz de Azúa, 'Sirat', de Oliver Laxe, 'Maspalomas', de Aitor Arregi e Jose Mari Goenaga, 'La cena', de Manuel Gómez, 'Sorda', de Eva Libertad e 'El cautivo', de Alejandro Amenábar, acaparan gran parte das candidaturas na 40 edición dos Premios Goya, tal e como anunciou este martes a Academia de Cine.
Os actores Toni Acosta e Arturo Valls foron os encargados de dar a coñecer as candidaturas desde a sede da Academia de Cine.
Das 218 películas inscritas aos Premios Goya 2026, 67 son óperas primas fronte ás 72 do ano anterior. Destas 218 producións, 123 son de ficción, 87 son documentais e nove son de animación.
No que respecta aos guións inscritos, 129 son orixinais e 42 adaptados. Tamén concorren este ano 18 filmes europeos e 15 longametraxes iberoamericanas, películas que foron escollidas polos seus respectivos países.
Esta edición premiará co Goya de Honra o cineasta, escritor e xornalista Gonzalo Suárez pola súa traxectoria "sorprendente" e "pioneira" que abrangue cine, literatura e xornalismo.
