O Parlamento garda un minuto de silencio por Ucraína, que centra un debate tenso

Comeza a sesión de control coa intervención do voceiro do Grupo Parlamentario Socialista. Luís Manuel Álvarez Martínez inicia a súa intervención lembrándolle ao presidente da Xunta que despois de trece anos "erráticos de Goberno do PP,  Galicia está peor que o resto de España en materia de igualdade". "A poboación activa feminina é inferior á masculina en case 50.000 persoas, case un 9 % menos e 5,4 puntos por de baixo da media estatal".

O voceiro socialista, di que en Galicia as mulleres, amais de ter máis paro e ter máis contratos parciais, "sofren de forma máis notoria a contratación temporal" e tamén son as mulleres as que máis solicitan a redución de xornada, "o 76,4 %, ao igual que as excedencias por coidado familiar, o 74 %".

Canto á brecha salarial entre homes e mulleres en Galicia, dixo Álvarez Martínez, "é dun 19,3 %, malia suba do salario mínimo interprofesional, o que implica que as mulleres traballen case dous meses ao ano sen cobrar".

"A falta de medidas por parte da Xunta", di o vociero socialista que fixo que a brecha de ocupación entre homes e mulleres se incrementara "nada menos que nun 65 %". "Esa brecha salarial tamén se constata no ámbito docente e investigador". A fenda de xénero tamén se dá no ámbito familiar, apunta o voceiro socialista, xa que son as principais encargadas da tarefa do fogar e de coidar os maiores e menores.

Álvarez Martínez: "Os datos evidencian o fracaso e a falta de políticas efectivas". "Galicia precisa de medidas eficaces e transversais en todos os ámbitos que permitan acadar unha igualdade efectiva entre mulleres e homes". "¿Señor Feijóo, e vostede feminista?".

O presidente da Xunta dixo: "Sorpréndeme que veña vostede con datos simplemente trucados, supoño que de boa fe, pero que non resisten unha mínima comparación obxectiva".

Alberto Núñez Feijóo: "Pregunta vostede, señor Álvarez, que temos pensado facer? Simplemente, o pasado xoves na Consello da Xunta de Galicia presentamos un novo Anteproxecto de Lei de igualdade na comunidade autónoma". Feijóo engadiu que esperaban que esa lei contase con todo o apoio da Cámara, "presentaremos esta lei no último trimestre deste ano".

Nesa lei inclúese, dixo Feijóo, "proseguir na loita contra a violencia machista das novas formas de acoso, como nas redes", e no eido laboral insistir na conciliación e no teletraballo. Haberá un tratamento especial para as mulleres do mar e as mulleres do rural".

Este Goberno, "despois de 40 anos", lembrou Feijóo, "construíu un departamento exclusivamente de emprego e igualdade". 

O presidente da Xunta dixo que Galicia "está mellor ca a media de España e mellor que a media de Europa". Feijóo lembrou que no 2009, "cando gobernaban vostedes", a taxa de emprego das mulleres era do 57 %, segundo a EPA, "agora é do 60,6 %". "Dous puntos por enriba da media de España".

Canto a taxa de paro feminino, Fejóo dixo que en Galicia é do 12,8 % e en España, onde gobernan vostedes, é do 16,7 %".

"499.005 mulleres afiliadas á Seguridade Social. É o record histórico da economía galega e do emprego feminino na comunidade autónoma", dixo Feijóo, e engadiu: "Señoría, seguen vostedes manipulado datos".

Canto á temporalidade, dixo Feijóo que o 73 % das mulleres ten contrato indefinido, "por enriba do que atopamos cando chegamos ao goberno".

Canto á fenda salarial, o presidente da Xunta que era a "sexta mellor de toda España". Se se compara en salario por hora, esta fenda é do "10,1 %, por debaixo da UE, que a ten no 14 %; por debaixo de Alemaña, o 19,2; de Francia, de Holanda, Dinamarca, de Noruega e de Suecia".

"As mulleres coñecen isto e saben que temos políticas, como, por exemplo, o plan Emprega en Feminino, de máis de 34 millóns de euros". Feijóo engadiu que Galicia é unha comunidade vangardista, que xa hai 30 anos que se aprobou o primeiro plan de igualdade.

"Investimos máis de 400 millóns de euros entre o ano 2017 e o ano 2020 e agora presentamos os principios básicos do oitavo plan estratéxico en materia de igualdade 2022-2027, que imos aprobar o próximo mes", dixo o presidente da Xunta.

O voceiro socialista dixo na súa réplica que "temos un problema serio" se se consideran "falsos os datos das institucións oficiais e da Universidade de Vigo, que foi os que utilizou no seu discurso, e engadiu: "Vén vostede aquí coa súa propaganda; xa coñecemos os anuncios en prensa desa futura lei, que non debe ser moi urxente porque acaba de dicir que virá ao Parlamento a finais de ano".

Álvarez Martínez preguntoulle ao presidente da Xunta se a nova lei vai a corrixir todos os problemas derivados dos doce anos das súas políticas en materia de igualdade e engadiu: "Necesitamos medidas reais como actualizar o plan de atención á saúde da muller, crear o instituto de saúde integral da muller, o estatuto da muller agricultora e gandeira, desenvolver políticas reais específicas para combater a desigualdade".

O voceiro do grupo socialista indicou: "Señor Feijóo, que vai facer cando teña que establecer pactos con quen quere acabar coas políticas feministas?".

O presidente da Xunta afirmou: "Non veño aquí facer política nacional". Logo referiuse aos datos que viña de dar e insistiu en que non os inventa, que son datos de institucións oficiais. "Deberían vostedes mirar as orixes dos seus datos".

Feijóo: "Pregúntame, señoría, se son feminista. Mire, nun utilizarei as mulleres para facer política". "O feminismo respectuoso, igualitario, o feminismo real, o feminismo da liberdade... son absolutamente militante de todos eses feminismos".

O presidente da Xunta dixo : "Recoñezamos o papel determinante da muller na nosa sociedade, recoñezamos que aínda hai condutas machistas, pero o que poden facer os deputados desta cámara, homes, é respectar as mulleres e non utilizalas para facer política".

A voceira do Grupo do BNG, Ana Pontón, comezou lembrándolle ao presidente da Xunta un titular de prensa do ano 2020 en que dicía: "É maior o meu compromiso con Galicia que co meu partido". "Vostede leva 12 anos subordinando Galicia aos intereses PP e obedecendo o que lle mandaban desde Génova". Lembroulle Ana Pontón que "agora, co permiso da señora Ayuso, xa está preparando as maletas para ir para Madrid".

Ana Pontón lembroulle a Feijóo que ante o "novo caso de corrupción fixo unha declaración de principios: "Os trapos lixosos hai que lavalos na casa, e quere varrer para debaixo da alfombra un novo caso de corrupción do PP". "Un novo caso de corrupción do PP é alfombra vermella que vostede estaba agardando para ir a Madrid".

Ana Pontón: "Unha vez que deixa claro que a súa prioridade é o PP, ten que dimitir como presidente da Xunta porque cada minuto que segue é unha falta de respecto a todos as galegos e galegas". "Agora que imos ter, un presidente ausente?".

O presidente da Xunta dirixíndose ao presidente da Cámara indicou: "Que quede constancia de que estou en presenza física e non estou facendo unha sesión de control por teléfono".

Feojóo dirixíndose a Ana Pontón: "Senoría, cando penso dimitir? Vostede autoformulouse algunha vez esta pregunta? Dígollo porque é política democrática que os que perden as eleccións de forma constante deberían pensar en dimitir".

Feijóo: "Este Goberno leva 13 anos consecutivos gobernando este país porque gañou todas as eleccións por maioría absoluta desde o ano 2009. Vostede leva 22 anos na cámara, perdeu todas as eleccións ás que se presentou o BNG".

Feijóo díxolle a Ana Pontón que mentres que o Goberno galego traballa para mellorar a vida dos galegos, o BNG está a pedir que a "OTAN se disolva". Engadiu que "Ucraína está sendo masacrada", que están matando a poboación civil e bombardeando hospitais e "o BNG se nega a condenar este tipo de atentados contra o dereito internacional, contra os dereitos humanos e contra a soberanía dun país".

O presidente da Xunta preguntoulle a Ana Pontón se considera que debe dimitir o señor Valentín Formoso, que acumula tres cargos: "secretario xeral do PSdeG, presidente da Deputación da Coruña e alcalde das Pontes" e que, "polo tanto, non se dedica a tempo completo" ao Concello das Pontes.

Na súa réplica, Ana Pontón dixo: "Señor Feijóo, teño que recoñecerlle que vostede é un excelente candidato a presidir o PP da corrupción e da falta de ética. A falta de ética que utilizou onte e hoxe neste Parlamento para atacar o BNG con mentiras".

Ana Pontón: "Voulle desexar unha cousa de corazón: que nunca teña que sufrir as manipulacións e as mentira que leva vostede inflixíndolle ao BNG e á miña persoa.

Para rematar, Pontón preguntoulle a Feijóo: "Cando ten pensado dimitir como presidente da Xunta?"

O presidente da Xunta respondeu dicindo que o "número de infamias e insidias" que escoitou como presidente "pódense comparar con calquera outro pronunciamento deste voceiro, sobre todo, de vostede". Feijóo engdiu: "Se vostede cre que pode vir aquí dicir que eu quero presidir un partido corrupto e quedar tan campante, é algo totalmente insidioso que eu non vou aceptar".

"Vostede non pode pedir a dimisión de ninguén porque vostede non está lexitimada, nunca gañou unhas eleccións", díxolle Feijóo á voceira do BNG.

"Non estou incompatible con nada e vostede sábeo", díxolle Feijóo a Pontón, e engadiu: "En todo caso, sei perfectamente que cumprirei as miñas obrigas como presidente da Xunta de Galicia ata o último instante e nunca renunciarei a cumprir esas obrigas e non terei nunca ningún suposto de incompatibilidade, nin sequera orgánica".

"Antepoñer os intereses de Galicia ao partido", díxolle Feijóo a Pontón "é pedir un réxime de cota no financiamento autonómico que está en contra de todos os intereses de Galicia. Antepoñer os intereses de Galicia ao partido, ao BNG, é ir na mesma papeleta co independentismo vasco, Bildu, e co independentismo catalán, Esquerra Republicana de Cataluña" (...) "É subscribir a investidura do señor Sánchez, que é o que fai o BNG, e despois queixarse do prezo da luz, do prezo do gas e da falta de competitividade da economía galega".

Feijóo: "Teño clarísimo que estou cumprindo co meu deber. Non lle vou dar estabilidade ao PP á custa da estabilidade de Galicia. Nunca o farei. Galicia é a miña nai e un nunca rexeita a súa nai".