Señé repite como baixa sensible no Rácing de Ferrol
Parralo: "Temos claro que o noso obxectivo segue a ser consolidarnos e manter a categoría"
O catalán Josep Señé será baixa por segundo partido consecutivo no Rácing de Ferrol, que este xoves despedirá 2023 e a primeira volta en Segunda División medíndose ao Real Valladolid no José Zorrilla.
Así o confirmou este mércores o adestrador verde, Cristóbal Parralo, que afirmou que o xogador "non chega" a este encontro por "unha pequena rotura", que levou ao corpo técnico a decidir que se prepare "para estar mellor á volta" da parada do Nadal.
O cordobés afronta a viaxe á cidade pucelana sen máis ausencias e avanzou que outro futbolista lesionado, Víctor Moya 'Chuca', "empezou a adestrarse co equipo", pero non aparecerá aínda na súa convocatoria.
Parralo reivindicou que un equipo "non se conforma só de once xogadores" e que necesita que "todo o mundo compita" e asegurou que o rival deste xoves é "moi potente", ten "moitos argumentos" e "vainos esixir moito".
Sobre o bo rendemento dos ferroláns, cuartos na táboa, apuntou que "é unha alegría verse aí arriba" porque "o traballo do equipo ten resultado, que acompañen os resultados e poidamos vernos aí é un motivo de confianza para afrontar o que nos vén".
"O noso obxectivo principal é consolidarnos", engadiu o técnico, que insistiu en lograr a permanencia "canto antes para pensar noutra cousa" e en que "agora non podemos pensar" máis aló dese obxectivo.
