Santiago solicita a declaración de zona de vivenda tensionada

Santiago pediu formalmente declarar a cidade como zona de mercado residencial tensionado. O Concello solicitou, ademais, que a definición de gran posuidor se amplíe os propietarios de máis de cinco inmobles -a lei considéraos a partir dos 10- e que os efectos desta declaración tamén se aplique ás vivendas que levan máis de cinco anos sen alugarse.

Comunicárono a portavoz municipal, Míriam Louzao, e o concelleiro de Urbanismo, Iago Lestegás, na conferencia de prensa posterior á reunión semanal da Xunta de Goberno local.

Agora, o Goberno galego ten un prazo de seis meses para resolver esta petición. No caso de non facelo, iniciaríase un proceso contencioso-administrativo.

A declaración de zona tensionada terá como consecuencias, entre outros, a aplicación de medidas de contención de prezos, o acceso do municipio a fondos estatais neste ámbito e a aplicación de incentivos fiscais.

Para chegar á solicitude, un grupo de estudos da Universidade da Coruña realizou unha diagnose a pedimento do Concello, que tivo un proceso de exposición pública. Esta certifica que o municipio cumpre con dous dos catro criterios marcados pola lei, que unicamente pide que se cumpra un deles para aceptar a declaración.  

Por unha banda, a carga media do custo do alugueiro supón o 31,1% da renda media dos fogares, mentres a lei marca como barreira o 30%. Por outra, o prezo medio do alugueiro por metro cadrado aumentou un 44,8%, mientres o IPC creceu un 20,8% nos últimos anos, de forma que Compostela supera "amplamente" a barreira de tensionamiento fixada no 23,8%. Outra das deducións do estudo é que "o que máis tensiona o mercado residencial de Santiago é o alugueiro".

Así mesmo, o consistorio elaborou un plan de medidas correctoras, que á súa vez foi avaliado en dous encontros da mesa sectorial. Dentro das liñas de actuación establecidas no mesmo, o municipio contempla impoñer un gravame fiscal ás vivendas baleiras con carácter permanente e a creación dunha empresa pública de vivenda, entre outras.

Santiago foi o primeiro municipio en manifestar a súa intención de utilizar este instrumento contemplado pola Lei polo dereito á vivenda. Agora convértese xunto á Coruña, que formalizou a petición a principios de abril, en ser as únicas localidades galegas en pedila.