Sanidade pide racionalizar o uso de fármacos en pacientes polimedicados
O 29,7 % dos maiores de 65 anos segue tratamentos con máis de cinco principios activos
Unha de cada tres persoas maiores de 65 anos está polimedicada. Considéranse así as que seguen tratamentos crónicos con máis de cinco principios activos distintos para tratar o colesterol, a diabetes, a hipertensión...
O Sergas financia o uso de despensadores de medicamentos para pacientes crónicos polidmedicados maiores de 70 anos que cumpran unha serie de requisitos. Prepárannos nas reboticas das farmacias adheridas, de xeito personalizado para cada paciente.
"Hai persoas que poden chegar a ter dez ou doce caixas de medicamentos, e iso faise moi complicado. Entón desta forma vese só alveolo baleiro, xa sabes que o tomaches ben", explica Natalia Martínez, farmacéutica do Milladoiro.
O Ministerio de Sanidade fai un chamamento á racionalización no uso dos medicamentos e a desenvolver estratexias para previr interaccións.
A porcentaxe de polimedicados é maior nas mulleres. Sobe do 45 por cento no caso dos maiores de 85 anos, pero volve baixar ao 30 % por riba dos 95.
